واحد النهار ديت الخبز للفران ولقيت واحد السيدة مخاصمة مع مول الفران حرق ليها الخبز ، جيت نهز الوصلة ديالنا وانا نسمعها قالت ليه حرام عليك أ لبشير وجايين عندي الضياف ! صراحة بقات فيا و معا كنا دايرين التقلية وانا ماعنديش معاها ، مارفدتش الهم لمالين الدار وانا نقوليها لالة ماتديريهاش مني قلة الصواب نقدرو نتبادلو الخبز ايلا قبلتي . شافت فيا وهي تقوليا غادي ديري خير كبير ا بنتي والله . قلت ليها عادي من القلب الصافي أ لالة . وبالفعل عطيتها خبزنا و عطاتني دوك جوج خبزات دايرين كي الفريزبي واها تفزكهم بالما مايدوزوش . جيت الدار ... دااااااااكشي لي دعاو مالين الدار فمول الفران مسكيين ! المهم لغد لهيه كالعادة وانا كانأدي الواجب اليومي ديالي (دي الخبز - جيبي الخبز ) لقيت ديك السيدة واقفة تماك غير شافتني و هي تجي عندي و كاتبسم ... تبااارك الله عليك أ بنتي ! خبز واش من خبز ! مزوجة ؟ ما قداتني الأرض و طمرت : لا أخالتي :$ . وهي تقوليا شوفي أنجيك من اللخر بغيتك لولدي ، مالقاش شي بنت بحالك ... خطبوني ... ولدها مانعاودلكوومش دازت شهر بيه فيه تزوجنا . الله يعمرها دار ! مهلي فيا و مهلية فيه ... ودابا كانتسناو وصلتنا اه زعما بنتنا الاولى أختي الفتاتش لا تيأسي بقاي تدي الخبز للفران وتجيبيه بكل صدر رحب ...واخا ماتكونيش نتي لي عاجناه . حيت بيني و بينك أنا براسي كنت غير مسخرة باقي القزبور و المعدنوس كايتخالطو ليا ...